John 18

Jesu tanggaganutnangge apbing.

(Mat 26:47-56; Mak 14:43-50; Luk 22:47-53)

1Jesuta tumuk wamu waaknga yawan puyuwana iat ninu pandetnaatda kuku yangga Kidrondane ganzikapa yatupbumang. Keu katau Oliv daka daka kwaiking komu kautdu saak yuwan Jesuat ninu pandetnaatda keu wakomu banakan katang kopbumang.

2Sike Judas aminu Jesu iwande yeuyamuyaapa itaaya keu wakomde atnataak. Dasingge? Tapduk bamu asinggan Jesuat nikat unekan gatake yuke keu wakomune kuke yuakumang. 3Unzingge Judasda amak aminu kundu gatu Anutue yot takwan gwene kayuya aminu kundu ngang papan keu wakomune apbing. Aminu wa apbingu Anutue yot takwan gwene pasiya amindane take akwakat gatu Ferisi amikatda yanipewa apbing. Apuke lam gwegwen gatu baakatap gatapakapuke sanga amakgane pake apbing.

4Siwan Jesuta sangabamu ie apiu atnatapbut. Atnatake kawawan aminu waakwau apa kake ita inengan kuke anzing yanikut, “Ginu maminde tawakaing,” ngang yanikwaiwan 5yake, “Ninu Jesu Nasaret nana apae apu tawakamang,” ngang iniwa yake, “Waapa nakan,” ngang yanikut. Siwan Judas aminu ayeuyamuyaapa iat gatake yuking. 6Siwan Jesuta, “waapa nakan,” ngang yaniwan wa aminu asisakuke kepdakane pimaking.

7Pimake yuwawa Jesuta gatuna yake, “Ginu maminde tawakaing,” ngang yanikwaiwan yake, “Jesu Nasaret nana apae tawakamang,” ngang iniking.

8Iniwa ita yake anzing yanikut, “Nata ginu danike, ‘Waapa nakan,’ ngang gwa danit. Sike ginu nae nawakengu aminu aakwau kapewa kukakut.” 9Ita wamu wa yake tumuk wamu takngatu tupa yakut taknga buya aawikge yakut. Sike tupa anzing yakut, “Aminu gata kaipakapi nae apbikat nana tapatuta wena dua sikut,” ngang yakut. Siwan, “Ginu aakwau kapewa kukakut,” ngang yawan 10Saimon Pitata paipna kaya siwan ita paipna kaitakakoke Anutue yot takwan gwene pasiya aminde tupan tapatane puya amina tanguke baaknga katakngi siyaapa saak nanandaka patdewan pimakut. Puya aminu waapa umana Malkas ngang iniking.

11Siwan Jesuta Pita anzing inikut, “Paipba tangine gatu tamumso. Nata meya Nanata nanitewan apuke kanangge apbum taknga akawit,” ngang inikut.

Jesu Anasde takuking.

12Unzing iniwana amak amikat gatu iat gatake apbingga Jesu tanggaganuke napda wambing. 13Napda wamake Anasde gamok takuking. Sike aminu waapa Kaiafas nakanu wagwene Anututane yot takwan gwene pasiya aminde tupan tapatane yepme. 14Siwan Kaiafas waapata tupa Judia aminu anzing yanikut. Aminu tapatutakan aminbamde tangge kungwayamik ngang yakut tapanin.

Pitata na Jesue dua nataat ngang yakut.

(Mat 26:69-70; Mak 14:66-68; Luk 22:55-57)

15Siwan Jesu Anasde takuwawa Saimon Pitaat naatda Jesu tawakumak. Sike Anas waapata nae atnataakge naat Jesuat Anasdane yotde daman gwekatang kopbumak. 16Undang koke ngana Pitata gwabok gwaune wesim yuwawan nata kuku maya gwabok gwakge kayuak kapa inike Pita daman gwekatang initakakopbut. 17Initakakopan maya gwabok gwaune kayuak kapata Pita anzing inikut, “Asikaya gakaya aminu waapatane pandetna,” ngang iniwan yake, “Aho na dua,” ngang inikut.

18Siwan puya amikat gatu akayuya amikatda got natake katau gwendu sake katap aiking. Siwan Pitaaya wa amikat yuke katap aikut.

Tupan tapata Jesu inikwaikut.

(Mat 26:59-66; Mak 14:55-64; Luk 22:66-71)

19Siwan Anasda Jesu pandetnae gatu wamu ita aminbam yanindamukutde inikwaikut.

20Inikwaiwan yake anzing inikut, “Nata wa aminu wamu anggaman asinggan yamukum. Asinggan nata aminbamu miti yot gwene gatu Anutue yot takwan gwene Judia aminda unekan apuke kekepna yuaing komune yanindamukum. Nata wamu takngatu kusopuknga atangu dua yakum. 21Dasingge gata na nanikwaikgayak? Gata aminu wamu waaknga natapbing amin yanikwaiyo. Wa aminu wamu nata yakum taknga atnataaing,” ngang inikut.

22Ita unzing yawan kayuya aminu tapatu une wesim yukutna waapata Jesutane amna wesike anzing inikut, “Gata wamu yake Anutue yot takwan gwene pasiya aminde tupan tapae unzingu ininggayak ba dasing,” ngang inikut.

23Iniwan yake anzing inikut, “Nata wamu wai yawanu gata wamu wai waaknga ngang yakapso. Sike nata wamu noman taknga yawa ngana gata dasingge na nukgayak,” ngang inikut. 24Iniwan napda Jesu wambingu unzing yuwawan Anasda yanipewan Anutue yot takwan gwene pasiya amindane tupan tapa Kaiafasde takuking.

Pitata gatu yakut, “Na Jesue dua nataat.”

(Mat 26:71-75; Mak 14:69-72; Luk 22:58-62)

25Yanipewan Kaiafasde takuwawa ngana Saimon Pitata dandam tangan yuke katap aike yukut. Aike yuwawan aminu undang yukingga anzing iniking, “Asikaya gakaya itane pandetna ba,” ngang iniwa ita umana takusopuke, “Na dua,” ngang yakut.

26Unzing yawan Anutue yot takwan gwene pasiya aminde tupan tapatane puya aminu tapatu Pitata baaknga patdekut tapaat nana tapatuta anzing inikut, “Siakan siknga! Nata ga ganduwawa iat puyaangane yuwawat gandut,” ngang iniwan 27gatuna yake, “Aho,” ngang yakut. Yawan zetgaman taakga wamu ayakut.

Jesu Pailatde takuking.

(Mat 27:1-2, 11-14; Mak 15:1-5; Luk 23:1-5)

28Siwan tembana siknga wa aminu Jesu take Kaiafas teke i take gavmanu tupan tapae yotnane takuking. Takuke ina dua gavmanu tupan tapae yot katangu kopbing. Wa aminu anzing natapbing. Tupan tapata ninu Judia amikatnana dua siwan ninda itane yotnaatang kokengu pasapmin zipbuke ninu Pasova tupduk takwan gwende nanamu nananga dua siwik ngang natapbing. 29Unzing natake kepman yuwawa Pailatda wa aminde kepman epuke anzing yanikut, “Ginda aminu aapae wamu dasing yanangge takapukaing,” ngang yanikut.

30Yaniwan yake anzing iniking, “Aminu aapa waiaknga dua tasikut gamu ninda i gae dua takapnam,” ngang iniking.

31Iniwa ita yake anzing yanikut, “Gisatakan yawa kumnanga aknga dasingge nae takapukaing,” ngang yanikut.

Yaniwan yake anzing iniking, “Ninda gavmandane mama wam sandeke aminu aapa dua tangutna kupik ngang natake gae takapukamang,” ngang iniking. 32Iniwa tupa Jesuta wamu ina dasingga akupik kakngae yakut taknga buya unin aatnangge singgak.

33Siwan wamu waaknga ngang iniwa Pailatda gatuna gavmandane yot gwene koke Jesu yatawamban akopan anzing inikwaikut, “Ga Judia amindane buyambam tapa ba dasing,” ngang inikwaiwan 34yake anzing inikwaikut, “Asikaya gika natake wamu waaknga yanggak? Ba aminu tapatuta unzingu nae ganiwan natake naninggayak,” ngang inikwaikut.

35Inikwaiwan yake anzing inikut, “Na aminu Judia nana gamu unzingu dua ganiwam. Gikaat nana amikat gatu Anutue yot takwan gwene pasiya aminde take akwakatda ga nae takapuing. Gata wai dasing kaknga tasikuyak,” ngang inikut.

36Iniwan ita yake anzing inikut, “Aminbamu keu andakane nana aminda dua yawa kekekawan na buyambam tapa dakngakum. Wena. Unzing gamu Judia nana aminda na gae dua napmaningge aminabapat amnam. Siwan ngana nata tupan tapa dakngawitde keu ayuamang komune nana aminda na dua tangenaking. Wena,” ngang inikut.

37Iniwan ita yake, “Ga aminu buyambamu tapatu ba dasing,” ngang inikwaiwan yake anzing inikut, “Gika unzing unin yanggayak. Na buyambam tapa. Na siakan wam yakapitde natake keu andakane epuke aakum. Aminu kuupbam wamu siakan wam tawakaingu nae wamu atnataaing,” ngang inikut.

38Iniwan Pailatda natake aminu kepdakane nana tapatuta siakan wam ngang yananga dua ngang natake Jesue anzing inisapdukut, “Siakan wamu wa dasing binga,” ngang inikut.

Amin saamdakane tangutningge yakut.

(Mat 27:15-31; Mak 15:6-20; Luk 23:13-25)

Ita unzing yake kepmanu gatu Judia aminde epuke anzing yanikut, “Nata wai takngatu itane kawa wena singgak. 39Ngana na gindane sanga aknga tawake ginda aminu kaaut yotde yuaikat nana tapatue umana naniwa sandetewa kuwik Pasova tapduk takwan gwenen. Unzingge asikaya ginu Judia amindane buyambam tapasa sandetewa kuwikge take ba nataaing,” ngang yanikut.

40Yaniwan yake, “Aho! Gata Barabas sandetewi kuyok,” ngang yanggamataking. Sike Barabas waapa amin zipmake amindane sangaapa kaiwa kuwa panggak kapanin.